MAHAL KITA Part 10

"Biglaan naman ang pagdalaw ninyong dalawa, may problema ba?" ang casual kong tanong sa kanila. 
"Josh sinamahan ko lang itong si Trisha, mayroon kasi siyang hihingiing pabor sa iyo." ang sagot ni Lalaine.
"Pabor?" ang natanong ko bigla. Kahit sino ba naman ay magugulat na humihingi ng pabor sa iyo ang taong bihira mo makausap.
"Ah eh Josh, alam kong hindi tayo ganoon ka close pero wag mo sanang isipin na katulad ko rin sina Tom na nangkukutya sa iyo. Maaari naman tayo maging magkaibigan di ba?" ang pagsasalita ni Trisha.
"O-oo naman" ang nasagot ko sa kanya. Hindi naman agad ako kumbinsido sa sinabi niyang iyon. Parang ang bilis naman niyang maging mabait sa akin."
"Mabuti pa at sabihin mo na sa kanya ang pakay mo. Ako naman ay lalabas muna at magpapahangin para na rin makapg-usap kayong dalawa ng maayos ok" si Lalaine sabay labas ng bahay.

Sinimulan na ni Trisha na sabihin ang tunay niyang pakay sa akin. "Josh tungkol kasi ito kay Antonio. May gusto sana akong itanong sa iyo kasi alam kong ikaw lang ang kaclose niya eh kaya kilala mo na siya"
"Medyo" ang alanganin kong sagot. Parang nakukutuban ko na ang ibig niyang ipahiwatig.
"Gusto ko kasi itanong kung may girlfriend na ba siya ngayon?" ang tanong niya.

"Sabi ko na nga ba gusto ng babaeng ito na makatiyak para naman kung maging sila ay walang magiging hadlang" ang nasabi ko sa aking sarili.
"Alam mo Trisha, ayon sa nanay niya na may pagkababaero siya nung nasa probinsya pa sila nakatira. Yung nanay pala niya ang nakausap ninyo kanina" ang sagot ko.
"So ibig sabihin marami na siyang naging girlfriends?" ang sunod niyang tanong
"Siguro oo, di malayong mangyari iyon kasi may itsura naman siya" ang sagot ko.
"Kung sa bagay, pero sa tingin mo ba eh may pag-asa kayang... hmmmm.... alam mo na.... yung maging kami.... na sagutin niya ako?" ang medyo nahihiya pa niyang tanong.

Nasaktan ang aking damdamin sa tanong niyang iyon. Kumpirmado ngang may gusto siya kay Tonton. Pero hindi ako nagpahalata. "Pwede, kasi maganda ka naman...hehehe" ang nasabi ko na lang sabay ngiting pilit.

Todo naman ang pagkakangiti niya sa sagot kong iyon. At ang sunod niyang sinabi ang nagpagimbal sa akin.
"Sana nga kasi alam mo una ko pa lang siya makita eh crush ko na siya tapos tuluyan nang nahulog ang loob ko sa kanya dahil sa kabaitang pinapakita niya sa akin. Kaya Josh may hihilingin sana akong pabor sa iyo kung ok lang?"
"S...si....sigeee basta kaya kooo" ang nauutal ko nang sagot.
"Kung maaari sana ay tulungan mo naman akong mapalapit pa sa kanya."
"Yun lang ba eh walang problema" ang sagot ko. Pianapakita kong ok lang ako na kaya ko siyang tulungan sa harap niya ngunit sa kaloob-looban ay sobra na ang aking kalungkutan.
"Salamat Josh, maraming salamat. Hayaan mo at tutulungan din kita sa mga problema mo sa abot ng aking makakaya pangako"

Marami pa kaming pinag-usapan tungkol kay Tonton. Nilahad ko sa kanya ang mga hobbies niya mga paboritong pagkain, yung mga bagay at ugali na ayaw niya sa ibang tao. Hindi sila nagtagal pa at umalis na rin matapos ang aming usapan.

Sa kwarto ay tuluyan na akong humagulgol. Papano na kaya ang damdamin ko para kay Tonton gayong nakapangako na ako kay Trisha. Panahon na siguro na ibaon na lang sa hukay ang anumang nararamdaman ko para sa kanya at simulang gawin ang mga bagay na hiniling ni Trisha. Dahil mahal ko siya ay handa na akong ipagkaloob ang kanyang kaligayahan sa piling ni Trisha.

Nasa kasagsagan ako ng aking pag-iiyak nang marinig ko ang boses ni Tonton habang kumakatok sa pinto. Agad ko namang inayos ang aking sarili sa pagharap sa kanya. Ayoko niyang makitang umiiyak ako.

"Tonton, ang tagal mo naman kanina pa kita hinihintay, ito oh pinalevel ko na muna yung character mo" ang salubong ko sa kanya.

Ngunit parang hindi niya ako narinig dahil nakatingin lang siya sa akin na tila nangingilatis.
"Josh umiiyak ka na naman ano. Kinakabahan na naman ako sa iyo eh" ang sabi niya sa akin. Bilib talaga ako sa kanya dahil alam niya ang nararamdaman ng isang tao base lang sa obserbasyon sa mukha nito.
"Wala ito, namiss ko lang kasi mga magulang ko" ang palusot ko na lang sa kanya.
"Sigurado ka, tumingin ka nga sa akin ng deretso" sabi niya sabay hawak sa aking baba para tumingin sa kanya. Pero nahuli niya agad ako dahil talagang di ako makatingin sa kanya.
"Sabi ko na nga ba at nagsisinungaling ka. Sabi ni nanay kanina may nagpunta dito kanina si Lalaine na may kasamang babae. Sa pagkakalarawan niya ay naisip kong si Trisha iyon."

Maya-maya ay hinawakan niya ang magkabila kong balikat. "Umamin ka nga sa akin Josh, may kinalaman ba sa pag-iyak mo ang pagdalaw ni Trisha dito?" ang deretshan niyang tanong sa akin.
Pilit kong pinipigilan ang aking sarili na maiyak muli. Siyempre hindi ko maaaring sabihin sa kanya ang napag-usapan naming dalawa Kaya nagdeny na lang ako. "Hindi ah, namiss ko lang talaga mga magulang ko."
"Ayan na naman tayong dalawa eh, alam mo naman di ba na ayaw kong makikita kitang nalulungkot kasi nahahabag ako sa iyo. Kaya nga palagi akong nandito sa tabi mo para bantayan ka at pasayahin. Ginagawa ko ang role ko sa iyo bilang kaibigan kaya sana man lang ay maappreciate mo iyon. Kung may problema ka ay huwag mong isarili. Sabihin mo sa akin, at pipilitin kong tumulong lalo na kung ako nga ang dahilan ng mga paghihinagpis mo" ang mahaba niyang pahayag sa akin.
"Tama magkaibigan nga tayo at nagpapasalamat ako na dumating kayo sa buhay namin. Huwag kang mag-alala kaya ko ito at magsasabi naman ako sa iyo ng problema ko kapag hindi ko na kaya at handa na ako. Tara na oh pa level mo na yung character mo." ang sagot ko sa kanya sabay lihis ng usapan.

Matapos maglevel ng kanyang character ay nagpasiya kaming manood ng mga funny videos sa youtube. Tawa kami ng tawang dalawa habang nanonood. Tila nabura pansamantala sa aking isipan ang lungkot na aking nadarama. Napapahiga na lang kaming dalawa sa sobrang tawa. Hindi ko namamalayan na nakahiga na pala ang ulo ko sa kanyang dibdib habang hawak ang tiyan sa katatawa." Nagbalik lang ako sa katinuan ng matapos ang video.

Nahiya naman ako sa aking ginawa kaya agad akong bumangon. "Sorry, di ko namalayan" ang paghingi ko ng paumanhin.
Tumitig siya sa akin. Ewan ko pero tila may malalim siyang iniisip. Bigla siyang nagsalita. "Bakit ka humihingi ng tawad? Wala namang masama sa ginagawa mo. At saka lumalamig ka na naman yata sa akin niyan. ayoko ng ganoon Josh"
"Hindi ah, pwede bang wag kang mag-isip ng kung anu-ano. Mabuti pa siguro at magmeryenda na tayong dalawa. Gutom lang yan eh" ang pag-iiba ko na lang ng usapan.

Nagpatuloy pa ang pag-uusap naming dalawa at paglilibang sa aking kwarto matapos magkuwentuhan hanggang sa umabot ito ng gabi.
______
Araw iyon ng Lunes, simula ng bago kong misyon ang paglapitin sina Tonton at Trisha. Pagkarating naming dalawa sa room ay binati kaagad ako ni Trisha. Tumayo siya at lumapit sa aming dalawa.

"Good morning Josh."
"Good morning din" ang nakangiti kong pagbati sa kanya. Kita ko naman sa reaksyon ng aming mga kaklase ang pagtataka sa biglaang pagpapansinan naming dalawa pero hindi ko na lang pinansin pa iyon.
"Hi Antonio" ang pakikay na bati naman ni Trisha sa kanya.
"Binabati ka ni Trisha oh sagutin mo naman" ang bigla kong pagsingit.
"Hello Trish" ang nakatawa niyang bati.
"Antonio mamaya sabay ulit tayo magrecess ah, may surprise ako sa iyo" ang sunod na sinabi ni Trisha.
"Oo nga Tonton, sigurado akong magugustuhan mo iyon" ang pagsingit kong muli.
Hindi kaagad sumagot si Tonton sa halip at tumingin sa akin. Nahalata ko naman na nagtataka siya sa mga nangyayari kaya gumawa agad ako ng paraan.
"Mamaya na siguro tayo mag-usap baka dumating na si mam" ang sabi ko na lang.

"Nag-uusap na pala kayo ni Trisha" ang sabi niya sa akin habang nakaupo at naghihintay na dumating ang aming guro.
"Oo naman nakipagkaibigan kasi siya sa akin nung dumalaw sila ni Lalaine noong Sabado. Mabait naman siyang tao kaya kinaibigan ko na rin siya." ang sagot ko.
"Iyon ba talaga ang dahilan, sana lang ay totoo yan." ang may pagdududa niyang sabi.
"Ano ka ba naman, huwag mo na ngang isipin yan."
Magsasalita pa sana siya nang maputol ito sa pagdating ng unang naming teacher sa araw na iyon.

Ang akala ko ay makakaligtas na ako sa topic na iyon pero hindi pala. Dahil magkatabi lang kaming dalawa ay nagtatanong pa rin siya sa akin tungkol doon.
"Josh, may nararamdaman akong may mali eh. Alam kong may pinaplano ka." ang bulong niya sa akin.
"Pinaplano, wala ano. Dapat nga maging masaya ka para sa akin dahil nadagdagan ako ng mga kaibigan." ang sagot ko sa kanya.
"Sige kung ayaw mong magsalita fine. Alam kong may tinatago ka. Pero ito lang ang masasabi ko sa iyo. Huwag mong ipilit na gawin ang isang bagay na  alam mong makakasakit sa iyo."

Tinamaan ako sa sinabi niyang iyon kaya hindi na ako nakaimik pa. Alam na kaya niya ang mga ginagawa ko? Kung oo, talagang bilib na ako sa kanya.
______
"Tonton, uuwi ka na ba?" ang tanong ni Trisha sa kanya habang inaayos ang kanyang mga gamit.
"Tonton, tinatanong ka ni Trisha oh" ang  pagsingit ko dahil hindi kaagad sumasagot si Tonton sa kanya.
"Ano yun ulit?" ang tanong niya. Napaisip ako bigla. Parang wala siya sa kanyang sarili at may malalim na iniisip.
"Tonton, tinatanong ka niya kung uuwi ka na?" ang sabi ko sa kanya.
"Oo naman" ang sagot niya. "Teka nga pala Josh, anong ibig mong sabihin na uuwi na AKO, di ba dapat ang sabihin mo ay uuwi na TAYO?" ang dugtong niyang tanong sa akin na binibigyang diin ang salitang ako at tayo.
"Hehehe, ikaw naman alam na niya iyon di ba Trisha?" Tumango lang siya bilang sagot.
"Tamang-tama Tonton, ihatid mo na si Trisha pauwi. Gamitin niyo na ang motor. Hindi kasi ako makakasabay sa iyo dahil may lakad kami ngayon ni Lalaine."

Rumehistro ang pagkagulat sa mukha ni Tonton sa sinabi kong iyon. Pero hindi ko ito pinansin.
"Hindi ba close na kayo. Kaya pagkakataon niyo na ito para mas maging malapit sa isat-isa." ang dagdag ko pa. Tinignan ko si Trisha at nginitian bilang pagpapahiwatig na ginagawa ko ang mga pinangako ko sa kanya.

Alam kong maraming gustong ikompronta sa akin si Tonton sa mga pinaggagawa at pinagsasabi ko. Kaya agad akong nagpaalam na umalis. "Sige mauna na ako sa inyo. Naghihintay na sa akin si Lalaine sa labas"

Nagtatakbo ako palabas ng school. Hindi ko na naman maiwasang maluha habang nag-iisip kung hanggang kailan ko kakayanin ang magsinungaling at ginagawa ko kay Tonton. Tutal naman ay binanggit kong dahilan si Lalaine sa kanila kaya agad ko siyang tinawagan para makisabay sa kanya kahit pa malayo ang bahay nila sa amin.
______
"Josh magmeryenda ka muna" ang alok sa akin ni Lalaine nang makarating sa kanila.
"Salamat."
"Alam mo friend naguguluhan na ako sa iyo. Hindi ko mawari kung bakit mo tinutulungan si Trisha kay Tonton."
"Ewan ko ba. Kahit ako rin ay naguguluhan na sa sarili ko. Basta ang alam ko, gusto ko lang maging masaya si Tonton, at sa isang babaeng tulad ni Trisha niya makakamit iyon. Alam naman nating masaya sila kapag magkasama di ba. Kaya naisip ko na lalo pa silang paglapitin."
"Eh paano na ka na. Sa ginagawa mong iyan parang inaalipin mo na ang sarili mo sa kalungkutan."
"Tama ka, sa totoo lang hanggang ngayon ay hindi pa ako handa sa maaaring maging resulta nitong mga ginagawa ko. Dapat siguro ay sanayin ko na ang sarili ko na tanggapin ang anumang magaganap sa kanilang dalawa"
"Ok. Kung sakali man na mangyari na magkatuluyan na silang dalawa ano na ang gagawin mo?"
Napabuntung hininga muna ako bago sumagot. "Ako, sa totoo lang di ko pa alam. Pero naisip ko na dumistansya sa kanya. Iiwasan ko nang lumapit sa kanya."
"Ganoon? Eh paano? Halos magkalapit lang kayo ng bahay. Isa pa ay inihabilin ka ng mga magulang mo sa kanya."
"Hindi ko pa alam friend. Pero balak ko na rin kausapin sina Mama at Papa tungkol sa bagay na ito"
"Talaga!" ang tila nagulat na sagot ni Lalaine. "Aamin ka na sa kanila friend?"
"Oo" ang medyo alangan kong sagot.

Itutuloy...

MAHAL KITA Part 9

Kinabukasan, naalimpungatan na lang ako sa amoy ng isang pagkain. Pagdilat ko ng aking mga mata, nasilayan ko sa aking tabi ang isang lalaking ngayo'y laman ng aking puso. Nakangiti siya na tila nakadagdag sa kanyang kagwapuhan. Isang napakaagandang umaga ito para sa akin.

"Breakfast in bed!" ang masigla niyang bati sa akin.
Bumangon ako at umupo. "Nakakahiya naman nag-abala ka pa ng pagkain."
"Bakit ka naman mahihiya, kung tutuusin dapat ako ang makaramdam niyan eh, ako ang nagyaya sa iyo na mamasyal tapos ako pa itong nilibre mo. Kaya naisip ko na kahit sa ganitong paraan ay masuklian mo ang ginawa mong iyon sa akin."
"Ganun ba sige salamat ha" ang sagot ko sabay kuha ng pagkain sa kanya.Tinabihan niya ako sa kama.

Habang kinakain ko ang binigay niyang sinangag na may bacon at hotdog ay napapansin ko ang pagtitig niya sa akin. Hindi ko tuloy maiwasang mailang sa kanya.
"Bakit ganyan ka kung makatingin sa akin? Di tuloy ako makakain ng maayos niyan." ang biro kong tanong sa kanya.
Bahagya siyang natawa bago sumagot. "Hmm, masaya lang ako Josh, sige kumain ka lang. Hayaan mo na lang ako na tignan ka" ang sagot niya sa akin.
"Ewan ko sa iyo" ang nasabi ko na lang sa kanya. Sa totoo lang nagugustuhan ko naman ang pagtitig niya lalo na ang pamatay niyang ngiti.
______
Sobrang gaan ng aking pakiramdam nang pumasok ako kinabukasan. At base sa aking obserbasyon ay ganoon din si Tonton. Kakaiba kasi ang nakikita kong saya sa kanya. Kung anuman ang dahilan niyon ay hindi ko na lang binigyang pansin pa.

Makalipas ng halos dalawang buwan ay ganoon pa rin ang set-up naming dalawa. Sa palagay ko nga ay mas lalo pang lumalalim ang aming samahang dalawa bilang magkaibigan. At kasabay noon ay ang lalong pag-usbong ng nararamdaman kong pag-ibig sa kanya.

Hindi na rin ako gaano kinukutya ng aming mga kaklase dahil na rin sa pagtatanggol sa akin ni Tonton. Sa nakikita ko ay talagang nagmamalasakit siya sa akin. Masaya ako dahil pinaninindigan niya ang pangako sa akin.

Pero may mga bagay pa ring bumabagabag sa aking puso, at tungkol ito kay Trisha. Minsan kasi ay nakikita ko silang magkasama ni Tonton. Sabay na kumakain sa canteen, sa pagresearch sa library at pati sa ilang class activities. Inaamin kong nagseselos ako sa kanilang dalawa. Pero wala akong magawa, hindi ko naman mapigilan si Tonton na lapitan siya dahil una, nasa iisang klase lang sila at pangalawa, baka kung ano pa ang isipin niya sa akin. Pinipilit ko naman ang aking sarili na isangtabi ang nararamdaman kong ito. Nakikita ko naman kasi kay Tonton ang kanyang effort na bigyan ako ng atensyon.

Isang araw ay napag-usapan namin ito ni Lalaine. Tapos na kaming magrecess at sabay na naglalakad pabalik ng room.
"Josh, napapansin mo ba na napapadalas na ang pagsasama ni Trisha pati ni Tonton mo. Tignan mo, minsanan na lang siya sumabay sa iyo kumain"
"Oo nga eh, pero hayaan mo na lang friend. Kasi lagi naman kaming magkasabay umuwi. Madalas din naman siyang naroon sa bahay namin." ang sagot ko sa kanya.
"Pero hindi mo ba naisip na baka magkadevelopan na silang dalawa. Ikaw rin baka isang araw ay magising ka na lang sa balitang may relasyon na silang dalawa"

Nakaramdam naman ako ng kaba sa sinabi niyang iyon. "Sa totoo lang matagal ko nang naisip ang bagay na yan. Pero wala naman akong magagawa kung maging sila naman. Normal lang na magkagusto siya sa babae kasi lalaki siya at normal lang ito. Sino ba ako para pigilan siya di ba?" ang malungkot kong pahayag.

"Ok, mabuti naman. Natutuwa ako sa lawak ng pang-unawa mo kaya panahon na siguro para ipakita ko sa iyo ito." ang sabi niya sa akin. Bigla naman akong nagkaroon ng interes kaya hinayaan ko lang siya sa kanyang ginagawa.
Gamit ang kanyang cellphone ay binuksan niya ang kanyang facebook account at pinakita niya sa akin ang profile ng isang niyang friend doon na si Trisha. 

"Tignan mo tong isang picture" ang sabi niya sabay pakita nito. Gulat, lungkot at inis ang aking naging reaksyon nang makita ito.Si Tonton at Trisha na magkatabi sa isang upuan na parehong nakangiti. Nakaakbay si Tonton sa kanya.

Ito yung picture nung niyaya siya ni Trisha sa salosalo ng kanilang pamilya, yung araw mismo na nagpunta kayo ng Luneta" ang sabi ni Lalaine sa akin.
Halos maiyak na ako sa mga sunod kong nakita. May mga larawan din silang kuha sa canteen at library na masaya at nakangiti.
"Alam mo ba Josh, tinatanong ko si Trisha tungkol dito, kung sila na ba ni Tonton. Pero sinasabi  niya na ibabalita na lang niya sa lahat kung mangyayari iyon. Sa ngayon daw ay may mutual understanding na silang dalawa. Napakasweet daw kasi ni Tonton sa kanya." ang sunod na pahayag ni Lalaine.

"Hayaan mo na sila" ang nasagot ko lang sa kanya. Pilit kong tinatago ang sakit at lungkot na aking nararamdaman. "Bilisan na lang natin baka dumating na si mam" ang dugtong ko pa.
______
Habang bumibyahe kaming dalawa ay hindi pa rin mawala sa isip ko ang mga pinakita sa akin ni Lalaine kanina. Dahil doon ay hindi ko magawang pansinin si Tonton. Hanggang sa makarating kami ng bahay ay wala kaming imikang dalawa.

Mabilis akong bumaba ng motor at inabot sa kanya ang helmet. Akmang papasok na sana ako ng gate ng bigla niya akong hinawakan sa aking braso. "Josh, saglit lang"
Tumingin naman ako sa kanya. "B-bakit?" ang casual kong tanong.
"May problema ka ba, kanina ko pa kasi napapansin ang di mo pag-imik sa akin eh. Hindi ka naman ganyan nitong mga nakaraang araw. Bumabalik ka na naman yata sa dati eh" ang sabi niya sa akin.
"W-wala naman, medyo masakit lang ang ulo ko, dala na rin siguro ito sa sobrang pagod" ang alibi kong sagot. Nang tignan ko siya ay bakas sa kanyang mukha na hindi siya naniniwala sa kanyang narinig.
"Josh, ayaw ko ng ganyan ah, na magbalik ka sa dati mong pag-uugali sa akin. Tapos nagsisinungaling ka pa. Di ba magkaibigan na tayo. Kaya kung anuman yang problema mo, maaari mong sabihin sa akin at pipilitin kong matulungan ka sa abot ng aking makakaya"
Napaisip akong bigla sa sinabi niyang iyon. Gusto ko na sanang sabihin sa kanya ang totoo pero pinangunahan na ako ng takot sa maaari niyang isagot at hiya na baka magbago ang tingin niya sa akin. Pumasok din sa aking isipan na napakaimposibleng iwanan at iwasan niya si Trisha bilang tulong sa akin.

"Ahm wag kang mag-alala ayos lang ako siguro kailangan ko lang ng tulog. Ilang gabi na rin ako puyat sa kalalaro ko sa laptop." ang sabi ko na lang sa kanya.
"Ok sige magpahinga ka na muna. Pero ito lang ang sasabihin ko, nandito lang ako para sa iyo" ang sabi niya.
"Sige" ang huli kong sagot at naglakad na ako papaok ng bahay.

Hanggang sa aking silid ay iniisip ko pa rin ito. Kaya habang tinitignan ko ang mga larawan ni Tonton sa kanyang facebook account na ginawa niya sa tulong ko ay kinakausap ko ang aking sarili. 
"Habang tumatagal pakiramdam ko ay mas lalo akong nasasaktan dahil sa pag-ibig ko sa iyo. Ano nga  naman ang laban ko sa isang babae di ba? At saka napakaimposible naman na maging tayo na mahalin mo rin ako ng higit sa isang kaibigan. Kahit papaano ay nakukuntento na ako sa pagiging magkaibigan natin, sa pag-aalaga, pagbabantay at pagiging maaalahanin mo sa akin pero hindi ko alam kung hanggang kailan ko ito paninindigan. Sa tuwing magkasama kayo ni Trisha ay sibat ito na tumutusok sa aking puso."

At tuluyan ko nang nilabas ang aking emosyon sa pamamagitan ng pag-iyak. "Dapat siguro ay maka-isip na ako ng mas magandang paraan. Hindi pwedeng maging malungkot na lang ako habang buhay."
______
Ilang araw pa ang lumipas na ganoon pa rin ang nararamdaman ko ngunit kahit papaano ay nakakayanan ko nang itago ito. Pilit akong nagpapakita ng saya sa mga tao sa aking paligid lalo na kay Tonton. Sa kabila kasi ng problema ko ay napapatawa niya ako sa pamamagitan ng kanyang mga jokes na ang ilan sa mga ito ay mag pagkacorny. May mga pagkakataon din namang namamasyal pa rin kaming dalawa sa mall. Sa bahay naman ay lagi lang kaming nasa kwarto ko. Magkatabi kaming nanonood ng mga videos sa aking laptop. Mayroon na rin siyang account sa facebook pati na rin sa mga nilalaro kong online games. Habang nagpapalevel ay tinuturo ko sa kanya ang mga dapat gawin. Mabilis naman siyang matuto.

At dahil sa angking talino nitong si Tonton ay tinuturuan naman niya ako sa mga lessons namin sa school. Kakatuwa lang dahil sa pagpupursige niyang matuto ako. Matyaga siya at mapagpasensiyang tao. Hindi ko mang lang siya nakitang naiinis sa akin kahit paulit-ulit siyang nagpapaliwanang sa mga lesson na nahihirapan ako at hindi ko agad natututunan.

Minsan nga naisip ko na sana ganito na lang palagi ang aming set-up dahil ito lang ang nagpapasaya sa akin. Pero gaya nga ng payo sa akin ni Lalaine noon pati na rin sa mga nagaganap sa paligid sa ngayon ay malabo itong mangyari.
______
Sadya talagang mapagbiro ang tadhana o ewan ko lang baka sinusubukan nito ang aking katatagan. Isang pangyayari ang biglang dumating sa akin.

Araw iyon ng sabado, abala ako sa paglalaro sa aking laptop. Habang hinihintay ko ang pagdating ni Tonton ay pinapalevel ko ang kanyang character. Kumatok sa aking kwarto ang nanay ni Tonton at sinabing may naghahanap sa akin sa labas.

Naputol ang aking ginagawa sa isang bisitang di ko inaasahan. Unang pagkakataon kasing pumunta siya sa bahay namin dahil hindi naman kami ganun ka close sa school. Kasama niya si Lalaine.

"Ah Lalaine, ikaw pala biglaan naman ang pagdalaw mo" ang salubong ko sa kanya. Agad ko rin namang binati ang kasama niyang babae. "Nandito ka rin pala Trisha, halika pasok muna kayo"

Magiliw ko silang tinanggap bilang bisita ngunit kasabay noon ang pagtataka sa biglaang pagpunta ni Trisha.

Itutuloy.....